[b]حد يشترى دعوة فرح
صحيت النهارد مفزوع جدا جدا جدا عشان كان فى خبط عالى على الباب , صحيت مقريف وناوى اقتل اللى بيخبط على الباب , وكانت المفاجأة لما فتحت ولقيت راجل مشفتوش من حوالى سنتين واتسمرت مكانى لانى عارف ان الراجل دا هياخد منك على الاقل 5ج دا لو هيقولك خبر وحش , واقل واجب بتاع 20ج لو هيقولك خبر حلو .
المهم ان انا مكنش معايا غير عشرة جنية كنت هنزل اقعد بيها على الcafe اللى بقعد فية وبعمل فية كل حاجة , باكتب فية واحيانا بذاكر ولو فى خروجة مزز هتبقى هناك , المهم ان انا بقعد هناك كتير وكنت مواعد اصحابى ان هقابلهم هناك النهاردة , لكن شكل الراجل دا هيعكننها عليا ومش هيبقى فى خروجة النهاردة وهتبقى قعدة كئيبة وناشفة وحتى مش هقول " ولعة يا هانى الحجر طافى " .
يعنى من الاخر الراجل دا هيبوظلى ترتيباتى .
المهم بعد ما شريط اليوم مر قدامى بظهور الراجل دا وحلم الخروج باظ رحت قايل للراجل : نعم , عايز اية , دا وقتة .
راح قايلى : ايدك على 50ج
قلتلة ليه هو انت جايبلى اسد فى ظرف _(الراجل دا البوسطجى ) _
راح قايلى لا انا جايبلك دعوة فرح من واحد اسمة جمال مبارك
فكرت شوية فى الاسم وحاولت افتكر اى حد بالاسم دا ملقيتش اى حد اعرفة بالاسم دا خالص
رحت قايلة_ وفى قرارة نفسى ان الخروجة هتكمل _ يلا يا عم من هنا بلا فرح بلا نيلة لم جواباتك من هنا وشوفلك مكان تانى
راح قايلى بشكل تهديدى : ذنبك على جنبك " وراح نازل سلمتين وراح لافف وشة وقايلى ان الدعوة دى جاية من القصر الرئاسى وان انا لازم احضر فرح الزعيم القادم للامة " جمال بية مبارك "
الصدمة خلتنى معرفش اعمل اية بس كان لازم اخد الدعوة بتاع الفرح وقلت للراجل معلش انا اسف هات الجواب
لقيتة بيقولى ايدك على ال50ج قلتلة نزلها شوية قالى لا لا لا
دخلت جوة ادور على اى فلوس و10ج بتاعتى على 13.5ج من جيب اخويا من غير ما يعرف على 15ج من تحت المخدة بتاع امى يعنى اشتغلت حرامى على الصبح عشان خاطر جمال بية وطلعت للراجل وانا مكسوف وقلتلة مش معايا غير 38.5ج وبعد ما ذلنى شوية كتار كتر خيرة وافق انه يدهالى بالفلوس اللى معايا , ما هو لو يعرف ان انا سارق الفلوس دى مكنش ذلنى كل دا.
اخدت دعوة الفرح وحطيتها عن الكمبيوتر وقعدت ابصلها وهى تبصلى وانا مش عارف اية الخطوة اللى جاية , وابص للورقة واتخيل سعرها 38.5ج وازعل جدا .
سبت الورقة وقمت ادخل الحمام وانا معدى قدام المراية لقيت واحد شعرة هايش بقالة شهر محطش علية اى كيماويات من يوم ما علبة الكريم خلصت , ودقن انما اية احسن من نجيلة استاد القاهرة , قلت فى بالى الشكل دا هيروح فرح ابن الرئيس ازاى , اذا كان بتكسف احضر فرح ناس اصحابى بسبب شكلى ودقنى اللى مش بحلقها غير كل شهر مرة وحتى فى المناسبات مش بحلقها لو مكنش الشهر عدى وشعرى الهايش اللى بحلقة فى الاعياد وبشتريلة علبة كريم واحدة فى السنة والعلبة خلصت السنة دى بدرى عشان اخويا كان بيستخدمها معايا وكانة بيحسب كريم الشعر اكل بيسفة زى السكر , قلت فى بالى مش مشكلة هتصرف وهاخد حتة جل معفنة من عند حمو صاحبى دا الجل مش بيخلى عندة من البيت بيشترى جل من ابو 1.5ج القزازة بس بتبقى ريحتة نفاثة وهو مش هيستخسرها فيا ,ودقنى قررت احلقها ويبقى محلقهاش الشهر اللى جاى كدا تمام .
خلصت حمامى ورحت فتحت التلفزيون ابو وصلة وقعدت اقلب فى القنوات مش لاقى اى حاجة لحد ما لقيت فيلم " ابو على " قلت اتفرج علية مع انى حافظة صم واول ما بيروحوا _كريم ومنى _ الواحات يروح الدش فاصل رحت متصل بالراجل اللى موصلنا راحد رادد عليا ببجاحة وقالى ان احنا مدفعناش الشهر دا وان انا لما اعدى اديلة ال10ج هيبقى يوصلنا تانى.
قعدت افتكر اية اللى كان حيحصل بعد المشهد وافتكرت الراجل وهوا بيقولهم " تعالوا اجيبلكوا خلقات جديدة عشان تحضروا الفرح انت لو حضرتوا كدا هتعرونا "
وافتكرت علطول دعوة الفرح المركونة عند الكمبيوتر وقعدت افكر هلبس اية وانا رايح الفرح دا , وشكلى هيبقى عامل ازاى وسط الناس اللى هتحضر الفرح , وفكرت فى البدلة اللى انا مفصلها عند ياسر زتون ودا احسن خياط رجالى انا وصلتلة , وتخيلت شكل البدل اللى هتبقى هناك اللى جاية من ايطاليا واللى جاية من بلد تانى واقل واحد فيهم هيبقى جايب بدلة فى طيارة مخصوص عشان يحضر الفرح , طب بذمتك كلى هيبقى عامل ازاى ؟؟؟
لا لسة الكرافتة اللى انا جايبها من وسط البلد , انا شايف حد بيغمزوبيقولى مهى لعبة معايا وبشترى كرافتات من محلات وس البلد ؟؟؟
هقولة لا لا يا ابو لسان طويل ,انا شاريها من الناس اللى بتبقى واقفة فى وسط الشارع بيبيعوا كرافتات وشرابات , لكن الشهادة لله انا مش بشترى شرابات من عندهم لان انا مش بلبس شرابات خالص تحن الجزمة , لا لسة الجزمة نفسها اللى صباعى الصغير بيبقى باين منها , لا هيبقى شكلى وحش اوى , بس قلت ان الجزمة م مشكلة هبقى استلف جزمة من اى حد من اصحابى اللى بيشتروا جزم ايطالى , اى نعم هتبقى اقل جزمة فى الفرح > بس مش مشكلة , قلت كدا مش ناقصنى اى حاجة واللى مش عاجبة يحسنى .
شوية وافتكرت ان انا لازم اروح بموبايل وساعة حلويين وغاليين وقلت الساعة هبقى اسرقها من ابويا والموبايل ال1100 مش هينفع فى المشوار دا وهسيبة خالص واقول ان فى ناس بتبقى عايزانى وانا بحاول انفضلها _اهو اى حجة والسلام _ كدا مش ناقصنى غير الشراب اللى هلبسة تحت الجزمة لكن افتكرت ان انا مش بلبس شرابات من اساسة وفى اللحظة دى اخدت القرار المناسب ان انا مش هروح الفرح دا خالص وقررت ان انا اسوق للدعوة بتاعة الفرح ولازم ابيعها , وفتحت موقع بتاع مزادات وحطيت الدعوة بتاع الفرح علية وكتبت شرط واحد جنب الدعوة بتاع الفرح .
ان المزاد هيبدأ ب 38.5ج .[/b]
الأحد مايو 13, 2007 3:29 am
محمود عندنا هنا .. جاي تبيع الدعوة وتمشي ولا هتقعد معنا شوية 
طيب هو في حد معاه 38 جنيه أساسا عشان تزودهم 
